bakthivahini
వాలి యొక్క దుఃఖం
Ramayanam Story in Telugu- కింద పడిపోయిన వాలి రాముడితో ఇలా అన్నాడు:
“ఓ రామా! నా ప్రాణాలు పోతున్నాయని నేను దుఃఖించడం లేదు. నా భార్య అయిన తార గురించి కూడా నేను బాధపడటం లేదు. కానీ గుణవంతుడు, బంగారు ఆభరణాలు ధరించిన నా ప్రియమైన కుమారుడు అంగదుడు సుఖాలకు అలవాటుపడి జీవించాడు. అతని భవిష్యత్తు ఏమి అవుతుందో అని నేను బెంగపడుతున్నాను. నా కుమారుడి యొక్క మంచిని, అభివృద్ధిని నీవే ఎల్లప్పుడూ చూడాలి.”👉 రామాయణం కథలు – భక్తివాహిని
రాముడి సమాధానం
రాముడు వాలికి బదులిస్తూ ఇలా అన్నాడు:
“ఒక వ్యక్తి ఏదైనా నేరం చేసినప్పుడు, ఆ నేరానికి ప్రభుత్వం నుండి లేదా రాజు నుండి శిక్ష పొందితే, అతని పాపం అక్కడితో తొలగిపోతుంది. ఒకవేళ శిక్ష పొందకపోతే, ఆ పాపం ఫలితాన్ని ఇవ్వడానికి సిద్ధంగా ఉంటుంది. వాలీ, నువ్వు అదృష్టవంతుడివి. నువ్వు చేసిన గొప్ప పాపానికి శిక్ష అనుభవించడం వల్లనే నీలో ఉన్న దోషం తొలగిపోయింది. నువ్వు శరీరాన్ని విడిచిపెట్టిన తర్వాత స్వర్గలోకాన్ని పొందడానికి నీకు ఎటువంటి అడ్డంకి ఉండదు.
అంగదుడు నిన్ను ఎలా చూసుకున్నాడో, నీ తర్వాత సుగ్రీవుడిని మరియు నన్ను కూడా అలాగే చూసుకుంటాడు. నీ కుమారుడికి పినతండ్రి వల్ల సమస్య వస్తుందని నువ్వు అనుకోవద్దు. నీ బిడ్డను తండ్రిలా కాపాడటానికి నేను ఉన్నాను.”
తార యొక్క ఆందోళన
వాలి కింద పడిపోయి ఉండటం చూసి చుట్టూ ఉన్న వానరాలు భయంతో పరుగులు తీశాయి. ఆ గందరగోళం విన్న తార బయటికి వచ్చి ఇలా అడిగింది:
“మీరందరూ ఇలా ఎందుకు పరిగెడుతున్నారు?”
వానరుల సమాధానం
వానరాలు భయంగా జరిగిన విషయం చెప్పాయి:
“రాముడికి, వాలికి యుద్ధం జరిగింది. వాలి పెద్ద పెద్ద చెట్లను, పర్వతాలను తీసుకొచ్చి రాముడి మీదకు విసిరాడు. ఇంద్రుడి చేతిలో ఉన్న వజ్రాయుధం లాంటి బాణాలతో రాముడు ఆ చెట్లను, పర్వతాలను కొట్టేశాడు. ఆ యుద్ధంలో చివరికి రాముడు వాలి మీద బాణం వేసి కొట్టాడు. నీ కొడుకుని కాపాడుకో, ఇక్కడి నుండి పారిపో!”
తార యొక్క దుఃఖం
తార భర్త దగ్గరికి పరిగెత్తుకుంటూ వెళ్ళి ఇలా విలపించింది:
“భర్త పోయిన తర్వాత నాకెందుకు ఈ రాజ్యం, ఈ కొడుకు?”
వాలితో ఇలా అంది:
“నేను నీకు చెప్పిన మాటలు వినకుండా ఈ పరిస్థితిని తెచ్చుకున్నావు. సుగ్రీవుడి భార్యను అపహరించి తెచ్చావు. కామానికి లొంగావు.”
అలా చెబుతూ కొన ఊపిరితో ఉన్న వాలిని చూసి దుఃఖించింది. తండ్రి మరణిస్తున్నాడని అంగదుడు నేల మీద పడి బిగ్గరగా ఏడుస్తున్నాడు.
వాలి యొక్క చివరి మాటలు
వాలి సుగ్రీవుడితో ఇలా అన్నాడు:
“సుగ్రీవా! నా తప్పులను లెక్కించకు. కాలం యొక్క బలమైన ప్రభావం నా బుద్ధిని మోహానికి గురిచేసి నీతో నాకు శత్రుత్వం వచ్చేలా చేసింది. ఈ ఫలితాన్ని అనుభవించడం కోసమే నన్ను నీ నుండి దూరం చేసింది. అన్నదమ్ములమైన మనమిద్దరం కలిసి ఒకే సమయంలో సుఖం అనుభవించేలా భగవంతుడు రాయలేదు. నేను వెళ్ళిపోయే సమయం దగ్గరపడింది. నీకు ఒక్క మాట చెబుతాను, ఇది మాత్రం జాగ్రత్తగా విను.
అంగదుడు నాకు ఒక్కడే కొడుకు. వాడు ఈరోజు నా కోసం భూమి మీద పడి బాధపడుతున్నాడు. వాడు సుఖాలలో పెరిగాడు, కష్టాలు తెలియవు. నేను వెళ్ళిపోయాక వాడికి సుఖాలు ఉండవు. నీ దగ్గర, పిన్ని దగ్గర ఎలా ఉండాలో వాడికి తెలియదు. తార బ్రతుకుతుందో లేదో నాకు తెలియదు. నా కొడుకుని జాగ్రత్తగా చూడు. వాడికి నువ్వే రక్షకుడివి. తారకు ఒక గొప్ప శక్తి ఉంది. ఎప్పుడైనా ఒక గొప్ప ఆపద వస్తే, అప్పుడు మనం ఏమి చేయాలో నిర్ణయించుకోలేని స్థితిలో ఉన్నప్పుడు, తన సూక్ష్మ బుద్ధితో ఆలోచించి చెప్పగలిగిన తెలివి తార సొంతం. ఒకవేళ అలాంటి పరిస్థితి ఏర్పడితే తార సహాయం తీసుకో. నువ్వు ఎప్పుడైనా కానీ రాముడిని అవమానించినా, రాముడి పని చేయడంలో ఆలస్యం చేసినా, నేను వెళ్ళిన మార్గంలో నువ్వు కూడా వచ్చేస్తావు, జాగ్రత్తగా ఉండు.”
“నాయనా! నా తండ్రి అయిన మహేంద్రుడు ఇచ్చిన మాల నా మెడలో ఉంది. నా ప్రాణం పోతే ఈ శరీరం శవం అయిపోతుంది. అప్పుడు ఈ మాల అపవిత్రమవుతుంది. ఈ మాల విజయాన్ని తీసుకొస్తుంది, అందుకని నీకు ఇస్తున్నాను, తీసుకో.”
అని ఆ మాలను సుగ్రీవుడికి ఇచ్చి ప్రాణాలు విడిచాడు.
తార యొక్క నింద
తార దుఃఖంతో ఇలా అంది:
“ఎప్పుడూ నీ నోటి వెంట ఒక మాట వచ్చేది. ‘సుగ్రీవుడా! వాడిని చితక్కొట్టేస్తాను’ అనేవాడివి, చూసావా! విధి ఎలా ఉంటుందో, ఈరోజు ఆ సుగ్రీవుడే నిన్ను కొట్టేశాడు. ఒంట్లో బలం ఉందని లేచింది మొదలు సంధ్యావందనానికి నాలుగు సముద్రాలు దూకావు. ఇంటికొచ్చి మళ్ళీ ఎవరినో కొట్టడానికి వెళ్ళేవాడివి. నీతో యుద్ధం చేసిన ఎందరో వీరులను ఇలా భూమి మీద పడుకోబెట్టావు. ఈరోజు నువ్వు కూడా అలా పడుకున్నావు. శూరుడైన వాడికి పిల్లనిస్తే, ఆమెకు హఠాత్తుగా వైధవ్యం వస్తుంది. అందుకని శూరుడికి ఎవరూ పిల్లని ఇవ్వకూడదు.”
| శ్లోకం | అర్థం |
|---|---|
| పతిహీనా తు యా నారీ కామం భవతు పుత్రిణీ | భర్త లేని స్త్రీకి ఎంతమంది కొడుకులు ఉన్నా, |
| ధన ధాన్యైః సంపూర్ణాఽపి విధవేత్యుచ్యతే జనైః | ధన ధాన్యాలతో నిండి ఉన్నా, లోకం ఆమెను విధవరాలనే అంటుంది. |
“మాట వినే కొడుకులు ఎంతమంది ఉన్నా, అపారమైన ఐశ్వర్యం ఉన్నా, నేను గొప్ప పండితురాలినైనా, నువ్వు వెళ్ళిపోవడం వల్ల లోకం నన్ను చూడగానే మాత్రం విధవ అనే అంటుంది.”
సుగ్రీవుడి పశ్చాత్తాపం
సుగ్రీవుడు రాముడితో బాధగా ఇలా అన్నాడు:
“నువ్వు చేసిన ప్రతిజ్ఞకు అనుగుణంగా వాలిని సంహరించావు. అన్నను చంపమని నేను నిన్ను అడిగాను. నేను దుర్మార్గుడిని. ఇప్పుడు నాకు తెలుస్తుంది నేను ఎంత అకృత్యం చేశానో అని. అన్నయ్య బ్రతికి ఉన్నంతకాలం అన్నయ్య పెట్టిన కష్టాలు తట్టుకోలేక అన్నయ్య పోతే బాగుండు పోతే బాగుండని నిన్ను తీసుకొచ్చి బాణం వేయమన్నాను. అన్నయ్య భూమి మీద పడిపోయాక అన్నయ్య అంటే ఏమిటో నాకు అర్థమవుతున్నది.”
“నేను వాలి మీదకు యుద్ధానికి వెళితే నన్ను కొట్టి ఇంకొక్క గుద్దు గుద్దితే నేను చచ్చిపోతానన్నంతగా అలిసిపోయాక ‘ఇంకెప్పుడూ ఇలాంటి పని చేయకు, పో’ అని వెళ్ళిపోయేవాడు. నన్ను చంపేవాడు కాదు. ఒక తల్లి బిడ్డలమని నన్ను ఎన్నడూ వాలి చంపలేదు. నేను చచ్చిపోతానని వాలి నన్ను అన్నిసార్లు వదిలేశాడు. నేను వాలిని చంపించేశాను. నీతో వాలిని చంపమని చెప్పినప్పుడు నాకు ఈ బాధ తెలియలేదు. జరిగినప్పుడు తెలుస్తుంది. అందుకని నాకు ఈ రాజ్యం వద్దు.”
“పెద్ద చెట్టు కొమ్మను విరిచి తీసుకొచ్చి దానితో నన్ను కొట్టి, ఇంక నేను ఆ దెబ్బలు తట్టుకోలేక పడిపోతే, ‘ఇంకెప్పుడూ ఇలాంటి తప్పు పనులు చేయకు, పో’ అనేవాడు. ఈరోజు నన్ను అలా అనే అన్నయ్య ఎక్కడి నుంచి వస్తాడు? ఇక నేను ఉండను. నేను అగ్నిలోకి వెళ్ళిపోతాను. రామా! మిగిలిన ఈ వానరులు నీకు సీతాన్వేషణలో సహాయం చేస్తారు.”
రాముడి యొక్క ఓదార్పు
సుగ్రీవుడు అలా ఏడుస్తుంటే చూడలేక రాముడు కూడా కన్నీళ్లు పెట్టుకున్నాడు. తార వాలిని కౌగలించుకుని ఏడుద్దామంటే రాముడి బాణం వాలి గుండెలకు గుచ్చుకుని ఉంది. నలుడు వచ్చి ఆ బాణాన్ని తీసేశాడు. తార భర్త యొక్క శరీరం దగ్గర ఏడ్చి రాముడి దగ్గరికి వచ్చి ఇలా అంది:
“రామా! నీ గురించి ఊహించడం ఎవరికీ సాధ్యం కాదు. నువ్వు అపారమైన కీర్తికి నిలయమైన వాడివి. భూమికి ఎంత ఓర్పు ఉందో నీకు అంత ఓర్పు ఉంది. నువ్వు విశాలమైన కన్నులు కలిగినటువంటివాడివి. నీ చేతిలో పట్టుకున్న కోదండం, నీ అవయవాల అందమైన పొందిక, దానిలో ఉన్న కాంతి చూసిన తర్వాత నువ్వు అందరిలాంటి మనిషివి కావని నేను గుర్తించాను. ప్రపంచంలో అన్నిటికన్నా గొప్ప దానం, భార్యా దానం. నేను లేకపోతే వాలి అక్కడ కూడా సంతోషాన్ని పొందలేడు. అందుకని వాలిని ఏ బాణంతో కొట్టావో నన్ను కూడా ఆ బాణంతో కొట్టు. నేనూ వాలి దగ్గరికి వెళ్ళిపోతాను.”
రాముడు తారను ఓదారుస్తూ ఇలా అన్నాడు:
“నువ్వు అలా దుఃఖించకూడదమ్మా. కాలం అనేది ఒక బలమైన శక్తి. అది పుణ్యపాపాలకు ఫలితాన్ని ఇస్తుంది. ఇక్కడ వాలి శరీరం ఇలా పడి ఉండగా మీరందరూ ఇలా మాట్లాడకూడదు. జరగవలసిన కర్మను చూడండి.”
వాలి అంత్యక్రియలు మరియు రాముడి సూచనలు
వాలి శరీరాన్ని అగ్నికి ఆహుతి చేశారు.
సుగ్రీవుడు, హనుమంతుడు మొదలైన వానరాలు రాముడి దగ్గర కూర్చున్నారు. హనుమంతుడు రాముడితో ఇలా అన్నాడు:
“ఇంత గొప్ప రాజ్యాన్ని సుగ్రీవుడు పొందేలా నువ్వు అనుగ్రహించావు. నువ్వు ఒక్కసారి కిష్కింధ నగరానికి వస్తే, నీకు అనేకమైన రత్నాలను బహుకరించి, నీ పాదాలకు నమస్కరించి సుగ్రీవుడు కృతకృత్యుడు అవుతాడు.”
రాముడు వారి కోరికను మన్నిస్తూ ఇలా అన్నాడు:
“పద్నాలుగు సంవత్సరాలు తండ్రికి ఇచ్చిన మాట ప్రకారం నేను అరణ్యంలో ఉంటాను. నేను గ్రామంలో కానీ, నగరంలో కానీ ప్రవేశించి నిద్రపోను. పెద్దవాడైన వాలి యొక్క కుమారుడైన అంగదుడు యోగ్యుడు. మీరు అతనికి యువరాజ పట్టాభిషేకం, సుగ్రీవుడికి రాజ్య పట్టాభిషేకం చేయండి. మీరందరూ సంతోషంగా కిష్కింధలో ఉండండి. ఈ వర్షాకాలంలో రావణుడిని వెతుకుతూ వెళ్లడం కష్టం. సుగ్రీవా! పట్టాభిషేకం చేసుకుని నాలుగు నెలలు యథేచ్ఛగా సుఖాలు అనుభవించు. కొండల మీద తిరిగి ఎన్నాళ్ల నుంచో కష్టపడ్డావు. కార్తీకమాసం వచ్చినప్పుడు నన్ను గుర్తు చేసుకో. అంతవరకు నేను ఊరి బయట ప్రస్రవణ పర్వత గుహలో ఉంటాను.”
అని చెప్పి సుగ్రీవుడిని పంపించాడు.
సుగ్రీవుడి పట్టాభిషేకం
కిష్కింధకు వెళ్ళాక సుగ్రీవుడికి పట్టాభిషేకం చేశారు. సుగ్రీవుడు మళ్ళీ తారని పొందాడు. అలా తార, రుమలతో బయట వర్షాలు పడుతుండగా సుగ్రీవుడు ఆనందంగా కాలం గడపసాగాడు.
